Niyftorzi niy widzom prowdy, som zazarci i durś godajom, co jynzyka ślonskigo niy ma, a jego durś słychać. Ale niy ino we wicach i szlagrach jakby chcieli widzieć. To downo i niyprowda. Terozki słychać go na binie Teatru Ślonskigo we Katowicach, na ftory we zeszły piontek mielimy premiera spektaklu "Tragedyjo Hamleta ksiyncio Dynymarku" we reżyserii jego dyrektora Roberta Talarczyka.

Ja, mocie recht to ślonsko wersjo "Hamleta". Tekst Williama Shakespearea na godka przełożoł fachowiec nojlepszy łod taki roboty, czyli Mirosław Syniawa. Z tym tyz sie poradzioł i to fest dobrze. Ksiondz Piotr Brząkalik, znany duszpastyrz i felietonista ślonski pedzioł nawet, co "Hamlet" po ślonsku lepi wybrzmioł, jak po polsku.

I co my na ty binie łobejrzeli" Dynymark to we ty wersji Ślonsk. To idzie poznać niy ino po tym co jego król Klaudiusz (we ty roli Marcin Gaweł), królowa (Barbara Lubos-Rokita), Poloniusz (Grażyna Bułka), a i som Hamlet (Paweł Kempa) godajom, bo sam wszyscy godajom, ale tyz po tym, co aktorzy som połyblykani we mundury górnicze i czaka ze fyjderbuszami, majom naszyte ślonskie fany, a farby śni (złoty a modry) som wszyndzie. Na binie leży mocka wonglo, nad niom wisi serce ze wonglo, widać koło zamachowe ze gruby, a zaś baby majom na gowach galandy (tyz złote a modre). Ślonsk nowego króla ftory zabioł brata, hamletowego łojca jest przaśny, ale Hamletowi, ftory dopiyro co skludzioł sie sam ze moderny Europy sie podobo. I bezto jest łon łozdarty, bo przeca musi pamiytnać, ło krziwdzie łojca i go pomścić. Bo tyz to mu nokozuje duch łojca (Robert Talarczyk).  

  Fest dobre jest to przedstawiynie, tragedyjo Hamleta przeżywomy ś niym, wierzymu mu. A scyna jego godki z matkom to coś fest mocnego. Mocno jest tyz muzyka: moderno, rytmiczno, basowo, ale i ciyżnko rockowo. Som momynty do płacu, ale i som do śmiychu. Może to i niy pasuje, ale uśmiychomy sie, jak kopidoły rychtujom grób dlo Ofelii (Ewelina Adamska-Porczyk). Bo kopidołami som profesory: downy rektor Uniwersytetu Ślonskigo Tadeusz Sławek i dzisiejszy Ryszard Koziołek. Zresztom co jom wom byda sam dużo łosprawioł - ciście na ślonskigo Hamleta, bo sie fest werci. I na zicher bydom ło tym godać za pora, abo i poradziesiont lot, jak ło cymś fest ważnym.     

A na koniec, bo możno som zeście ciekawi, to musa napisać, co hamletowe "To be or not to be. This is a question", czyli "Być albo nie być. Oto jest pytanie" po ślonsku godo sie:  "Być abo niy być, to ci je pytanie." A reszta jest milczyniym.