Fusbal, fusbal - dogrywka

Niy spodziywoł zech sie, co jak byda pisoł ło fusbalu, to jedyn tekst mi niy styknie. A jak tak, to dzisioj momy dogrywka. I fto wiy, cy za tydziyń nie bydom koniecne elwry, bo zaś mi braknie placu.

Data: 07.07.2024
Autor: Tomasz Nowak

Spomniało mi sie, co sie downi godało wicnie, jak ftoś pytoł sie ło wynik szpilu. Mogli mu pedzieć: "3:3 i bala pynkła", czyli "3:3 i piłka pękła". A jak juz godomy ło pynkniony bali, to mom inksze wspomniynie. Za bajtla rod zech cytoł taki cajtung "Sport śląski". Pisali tam ło szpilach i drużynach z nojniższych lig. I roz sie wzionli za szpil w C klasie we ftorym juz na pocontku właśnie pynknoł bal, a dziurawym niy szło dali grać. Klub boł biydny i okazało sie, co inkszych bali, takich zapasowych akurat niy majom. Drużyna gości miała wiyncy bali, czimała je zawarte we autobusie, ale pedziała, co ich niy do, bo niy musi. Skońcyło sie tak, co gospodarze przegrali walkowerym. A goście stracili szansa na fair play, ino chyba ani ło tym niy wiedzieli.

Pamiyntom jesce jedna drużyna, tyz z C klasy, ftoro kożdy szpil przegrywała dwucyfrówkom. Jo niy wiym, co tam za grocy mieli - możno jakich kulawych, abo ślepych - bo łoni dostowali łod kożdego poranoście bramek, a sami żodny szczelić niy poradzili. No dobra, tak po prowdzie pora we sezonie szczelyli. Bezto niy ma sie co dziwać, co zowdy byli na końcu tabeli, ale ślecieć juz kaj niy mieli, bezto sie chyba niy starali. Ludzie śmioli sie, co we ty drużynie niy ma tormana, a zamiast niego jest łozhuśtano lajsta (rozhuśtana listwa) przyczepiono na gwoździu do laty (poprzeczki). Bez to toru niy boło ino, jak fto mioł fest pecha i cylnoł gynau w ta lajsta.

A i jesce dwie rzecy: jak wom jaki Ślonzok ciepnie propozycjo: Idymy dzisioj na wiecór na bal, to niy sztiglujcie sie, niy zakłodejcie maski i niy rychtujcie sie na tańcuwanie. Bo łon wos niy chce zabrać na bal - na przykład maskowy, ale na piłkę. Niy ma co, musicie dować pozór. A drugo rzec to start Poloków na EURO we Niymcach. Co mom na tyn tymat do pedzynio? Ino to, co Michał Probierz mioł fajne ancugi. Nojbarzi mi sie podoboł tyn z westom we kratka. Chyba sie taki kupia. Ale to dopiyro, jak ściepna pora kilo.