Wziynli nom arcybiskupa

Krótko my sie raduwali skiz tego, co arcybiskup Adrian Galbas boł metropolitom katowickiym. Łoroz wziynli go nom do Warszawy i teraz tam bydzie metropolitom.

Data: 21.12.2024
Autor: Tomasz Nowak

Jedyn z czytelników napisoł we komyntarzu na naszy internecowy cajcie, co sie fest staro ło arcybiskupa i namowio nos, coby za niego rzykać. To koniecnie musymy zrobić, rzykanie pomogo na wszysko, ale jo wiym, co Adrian Galbas, chop ftory sie chowoł we Karbiu i na Szombiyrkach do sie rada. Nawet pomiyndzy warszawiokami.

Rok nazod boł zech u arcybiskupa we katowicki kurii, coby ś niym połosprawiać ło Bytoniu, Ślonsku, kościele i ło religii. Cuł zech sie tam dobrze, a gospodorz niy wysyłoł żodnego sekretarza, ino som po mie prziszoł, zakludzioł do srogi sali, ftoro odymkinoł srogymi klucami, spytoł sie, cy chca tyju abo kawy, a na koniec mie zakludzioł do drzwi i dugo wypytuwoł, co tam słychać we jego rodzinnym mieście. Ani zech sie tymu wszyskymu za fest niy dziwuwoł, bo przeca boł zech u ekscelyncji, ftory swe listy do wiernych podpisuwoł zowdy: wasz biskup Adrian.

Niy doł mi tyz arcybiskup skońcyć piyrszego pytanio i łod razu pedzioł, co niy śmiy nie pedzieć jak mo we zocy Życie Bytomskie. Jego łojcowie zowdy je kupuwali, a łon ucył sie na naszym cajtongu skłodać literki i cytać! A potym łosprawioł jaki ś niego boł za bajtla zgobnik i jak łojcowie skiz tego musieli durś łazić pogodac ze rechtorami. Piyknie Adrian Galbas godoł tyz ło Ślonsku, ło tym, jak bez cołkie lata rzondzoncy we Warszawie naszy ziymie i naszych ludzi niy szanuwali i mieli ich za nic.

Po naszymu tyz my sie pogodali, bo arcybiskup poradzi godać: godało sie u niego w doma i na placu, jego starka ino godała. "Nigdy się Śląska i swojego śląskiego pochodzenia nie wstydziłem, przeciwnie: to duma. Śląskość pomaga mi w obecnej posłudze, gdybym nie był stąd, trudno byłoby mi tu dzisiaj być biskupem" - mówił już po polsku.

Bytomski arcybiskup juz sie pożegnoł ze Ślonzokami i Ślonskiym. A do Bazyliki we Piekarach nawet we łostatni pyndzialek ekstra przijechoł, coby podziynkuwać za wszystko Matce Boży Piekarski i porzykać, coby durś dowala na niego pozór. Żodnymu ło tym byzuchu noprzód niy pedzioł. Łoroz wloz do zakrystie ło szósty rano, a farorz, kapelonki i wierni fest sie dziwuwali. Ino że arcybiskup chcioł przijechać na roraty, a niy wiedzioł, co we Piekarach roraty som na wiecór.