Pućcie wszyscy do betlyjki

Napocnijcie łod naszych, bytomskich i radzionkowskich kościołów. Betlyjka mocie postrojono we kożdym, kożdo inkszo, a niyftore fest wymyślne. Mie sie nojbarzi podobajom te w kościele wele Rynku i we starym kościele na Szombiyrkach. 

A jak juz łobejrzicie nasze żłóbki, to koniecnie sprowdźcie, co tam inksi wymyślili. Ceko na wos Piekarskie Betlejem - daleko niy mocie, nawet autobusym roz dwa dojedziecie. Znojdziecie je wele Piekarski Bazyliki, ale nie jak downi na Rajskim Placu, ino trocha dali, a bliży fary. We Betlejem treficie żywo gadzina: alpaki, osiołki i łowce, som tyz ruchome postaci historyczne, jest anioł, ftory zagro na trombie, jak mu co wciepniecie. Ekstra wele ty srogi piekarski betlyjki stoi familok, a we środku izby narychtuwane jak to piyrwy. Mocie byfyj, srogi trzidrzwiowy szrank, łóżko, wertiko, waszbret, kachlok i roztomajte nocynie. Ale po prowdzie powiym wom, co nowe Piekarskie Betlejem mni mi sie podobo, łod tych downiejszych. Jakoś tam niy cuja klimatu.  

Z Piekor mocie juz niydaleko do Łorzecha. A we kościele ceko na wos piykno betlyjka, ftoro cuzamym ze kamratami łod lot rychtuje Piotr Płonka, downi grubiorz ze gruby Powstańców Śląskich we Radzionkowie, a teroz chop na pynzyji. Musicie wiedzieć, co kożdego roku wynokwi łon cołkiym inkszy żłóbek, a wrazi do niego niy ino Dzieciontko ze Józefym i Maryjom, pastuszkami i Trzema Królami, ale tyz grubiorzy, gospodorzy przi robocie i inkszych ludzi, a do tego jesce gadziny. Betlyjka świyci sie, gro, jeji tajle sie ruszajom, bo som na sztrom. Coby to wszystko do porzondku łobejrzeć musicie mieć fest dużo casu, ale dejcie sie pedzieć: niy bydziecie żałówać, a bajtle bydom miały kupa uciechy. 

Kej mocie jesce wiyncy casu, to wybiercie sie do Katowic-Panewnik, do Bazyliki św. Ludwika Króla i Wniebowzięcia Najświętszej Maryi Panny. Tam majom nojwiynkszo betlyjka, a niyftorzi godajom, co i blank nojpiynkniejszo i nojbarzi paradno na cołkiym Ślonsku. Łona tyz sie ruszo, a zrobyli jom z setek tajli. Niy ma co godać: werci sie jom łobocyć.