Ślonzok Ślonskiym wiedziony

Pominoł Alojzy Lysko. Wielki Ślonzok rodym ze Bojszów. Jedyn z Nojwiynkszych we naszych casach. Som godoł, co bez cołkie życie boł Ślonskiym wiedziony. I to jest echt prowda. Przoł Ślonskowi jak mało fto, całym sobom. I poradziył tym swojym spokojnym głosym godać ło Ślonsku jakoś tak, że zaroz chytało za serce

Niy mom tu doś placu, coby łopisać wszystko, co Alojzy Lysko zrobioł dlo Ślonska. Bezto dom pozór na jego ksionżki, bo som piykne, prowdziwe i napisane sercym. Kożdy zno szumny monodram "Mianujom mie Hanka", ftory na binie gro Grażyna Bułka. To dramatyczno historyjo Ślonska we XX wieku łopedziano ze perspektywy Ślonzocki. Fto pozno jeji losy, tyn niy ino niy zasztopuje płacków, ale co nojważniejsze bydzie mioł szansa zrozumieć Ślonsk i Ślonzoków.  

Mni znany, ale tak samo dobry jest monodram: "Godajom mi Helmut". To tyz historyjo Ślonska, ale tom razom autor pokazuje losy chopa. Alojzy Lysko napisoł to na podstawie swoich inkszych (podug mie jesce lepszych łod "Mianujom mie Hanka") ksionżek "Duchy wojny". Jest ich dziewiynć tajli. Keby ftoś spytoł sie mie, cy mom we zocy jakoś ksionżka ło dziejach Ślonzoków we XX wieku, to zaroz bych mu doł je wszyske, bo taki historyje Ślonzoków nikaj indzi niy znojdziecie. Cytoł zech je po poranoście razy i wiym, co byda do nich wrocoł. Po prowdzie, ze srogym żalym, bo nowych tajli juz niy bydzie.

Lysko łopisuje jak szukoł grobu łojca, ftorego zabrali na wojna do Wehrmachtu i ftory pominoł we Rusach. Dowo pozór na kobiyty, co jak jego matka cekały na swoich chopów, bo ci niy przyszli z wojny i niy boło wiadomo, co sie ś nimy stało, cy żyjom we lagrach, kaj som pochowani. Pokazuje, jak musiały sie dować rada same, jak jejich bajtle, a w tym mały Lojzik, boły poniywiyrane w komunistyczny Polsce, bo te pierony durś kozoli jym udowodniać, co som Polokami, a niy Niymcami, abo Ślonzokami. I durś jym niy wierzyli, durś chcieli ukrziwdzić i niy dowali żyć po swojymu. Marzy mi sie, co ftoś kejś przecyto "Duchy wojny" i zrobi film ło Ślonzokach. Taki piyrszy prawdziwy. 

  Ale musicie wiedzieć, co Alojzy Lysko niy ma ino autor ksionżek dlo starszych. Mocka napisoł tyz legynd i bojek ło ślonskich straszkach i to wtedy, jak to niy boło jesce we modzie. Te jego historyje, erbnione łod  łojców, abo starszych Bojszowian som niysamowite. I to niy ma ino historyje ło Bebokach, Utopcach, abo Heksie, bo to kożdy zno. Cytejcie Alojzego Lyski, a dowiycie sie, co to Maludy abo Śmiyrtki.                  

.