Zisty, torty, kreple i kołocki

Łod bajtla fest rod jym słodke rzecy - ja, wiym, co to po mie poznać. A slodke rzeczy, to niy ino bombony i szekulady. Bez to zabiera wos dzisioj do ślonski cukierni.

Zacynomy łod arcyślonskigo kołoca. Ino pamiyntejcie: to kołoc, ewentualnie kołocz, a niy żodyn kołacz jak casym stoi napisano we sklepach. I jesce jedno: niy godejcie na kołoc ciasto, abo placek, bo znerwujecie kożdego Ślonzoka. I to fest. 

Nojlepszy podug mie jest tyn ze makym. Drugi plac do kołoca ze serym (niy ze kyjzom, bo kyjza to ser żółty, a nie biały), a trzeci do kołoca ze posypkom, czyli po polsku kruszonką. To wersjo podstawowo. Bez lato fest smakujom tyz kołoce ze łowocami: nojbarzi taki ze śliwkom. Mak, syr, posypka i roztomajte łowoce dowo sie tyz do kołocków (kołoczków, nie kołaczków!), a więc drożdżówek. Som tyz kołocki wynokwiane, choby taki ze pudingiym. 

We kożdy cukierni dostaniecie tyz kreple, czyli pączki. We kreplach nojważniejszy jest filong, a więc nadzienie. Niy wiym, jak wy, ale jo nojbarzi jest rod marmeladzie, abo dżymowi - nojlepi takymu ze podzimek (truskawek). Ale kej mi docie do skosztuwanio krepel nafiluwany szekuladom, szlagzanom (bitą śmietaną), abo makym, to przeca tyz sie na wos niy pogorsza. 

Filongu niy szukejcie we zistach, abo jak sie tyz godo babówkach, bo ich tam niy znojdziecie. Zista to babka: piaskowo, ze polywom szekuladowom, kakaowo, cytrynowo - jako tam chcecie i wymyślicie. We jedny cukierni widzioł zech tako jedna, co jom sprzedowali na metry choby sztof. 

Ciasto to po naszymu ciasto - tu nie ma ło cym godać. Ale tort, to juz torta. Teroz torta poradzi być jak dzieło sztuki: wysoko, słożono ze poru sztoków, a więc pięter, paradnie postrojono i ze roztomajtymi warstwami. I to niy ino jak downi na weselu, ale tyz na gyburstagu, abo jakym inkszym fajerze - nawet tak na beztydziyń. A wiycie, co to tortynsztiki? To ciastka tortowe. Ze krymym, polywom, kokosym, roztomajtymi filongami, abo łowocami pod galaretkom.  

Dobra, jo tego juz dużi niy strzimia. Ida wartko sie kupić jaki kołocek ze dżymym. Abo nojlepi ze dżymym i syrym. Bo kawa mom juz downo narychtowano.