Jo sie zdowom sprawa, co po trzech latach pisanio we Życiu Bytomskiym po ślonsku (a tyla to juz trwo) trocha gupio jest dopiyro teroz chytać sie tymatu witanio, ale w końcu trza to zrobić.

Inacy być niy może, musymy zaconć łod arcyślonskigo "Szczynść Boże". To możcie godać zowdy i kożdymu, na pocontku i na końcu trefu, bo to zowdy pasuje. I pamiyntejcie: To jedyno witaczka, ftoro sie używało i durś używo na grubie. Jak sjedziecie szolom na dół i treficie sie tam z grubiorzami, to powiydzcie im "Szczynść Boże" i nic inkszego. Nawet za komuny wszyscy tak godali. I ani niy próbujcie tego zmiyniać, bo ino Skarbnika znerwujecie.    

Oficjalno ślonsko witaczka to: "Witom wos piyknie". Kej ftoś wom tak powiy, to możecie łodpedzieć: "Jo tyz wos witom", abo "Witom wos takom samom witaczkom". Niyoficjalnie, jak sie z kymś treficie, abo kajś przidziecie (do sklepu, do znajomych), to godocie: "Dobry", co jest śląską wersją polskiego "Dzień dobry". Wieczorem zmienia się to na: "Dobry na wiecór". Blank niyoficjalnie na powitanie możecie ciepnonć "Pyrsk". To nic innego, jak "Cześć". Możno fto pamiynto, co gynau tak ze swojymi radiowymi suchaczami witali się Masztalscy, ftorzi godali: "Pyrsk ludkowie". 

Som tyz inksze luźne i take barzi wicne witaczki, abo słowa na pożegnanie. Niy wiym po jakymu, ale tych drugich momy dużo wiyncy. Na pożegnanie możecie komuś pedzieć: "Chowej sie", abo "Trzimej sie" (takie polskie "Trzymaj się"). Riposta do tego, to: "Ja, ty tyz sie niy puscej". Nado sie tyz tako wersjo: "Trzimej sie luftu", czyli "Trzymaj sie powietrza". Fajne jest pożegnanie: "Przidom zaś", bo to tak po prowdzie zaproszynie. 

   Jo jak sie ze kymś żegnom, to rod godom: "Patrz tam jako". Niydowno zgodali my sie na tyn tymat ze mojym kamratym i wyszło nom, co te słowa som fest pojymne i majom różne znacynie w zależności łod tego, jak staro jest osoba, ftory to godomy. Ale zowdy to ostrzeżynie, abo przypomniynie. Bo jak "Patrz tam jako" powiymy do małego bajtla, ftory się idzie bawić na plac, to godomy mu, coby dowoł pozór na zagrożynia i uważoł na siebie, a do tego niy jeździoł wartko na kole. Ale jak nastoletni karlus słyszy łod łojca: "Patrz tam jako", to richtich mo usłyszeć: "Idź ze kamratami kaj chces, ale cobyście niy kurzyli cygaryt, abo nie robili cego gorszego". A blank co inkszego sie chowo pod słowami "Patrz tam jako" pedzianymi do starszego karlusa, ftory idzie na zolyty. 

A  na koniec coś na dobranoc. Moja teściowo mo takie hasło: "Śpij na łokrongło, coby ci sie nic niy wylongło". Toz pyrsk!