Hica fest, pić sie chce

Hica momy tako, aze idzie skiz ni zgupieć. A jak hica, to wiadomo - trza dużo pić. Teroz durś ino ło tym godajom, a przipominajom, wiela to litrów musicie wloć w siebie na dziyń (nojlepi z elektrolitami), coby sie wom nic niy stało. Downi - jak zech boł bajtlym, a to noprody fest downo - tak niy przipominali, musieli my wiedzieć to sami.

I jak tak teroz siedza w ty hicy i gupieja, to sie przipominom, co my to za bajtla piyli. Nojlepszo boła woda ze kokotka, ftory pić niy dowali. Wrozało sie pod niego gymba i tyla - fto by tam loł do jaki szklonki. Do ty wodo szło dodać trocha natronu, czyli sody oczyszczonej i tak sie robioło oranżada. Abo łyżka dżymu, ftory kożdy sie musioł potym do porzondku łozfyrlać łyżkom, coby te rube niy łostało na dole. Tako woda z dżymym dowali do łobiadu jako kompot na kożdych koloniach, abo na obozach. Ale w doma tyz sie go rychtowało.

Lepi smakowała woda ze cytronom i cukrym, jak noprzód jedno i drugie dostaliście we sklepie, a to nie boło proste. Ino jakoś żodyn niy godoł wtedy, co to lemoniada. A juz fest maszkyt sie miało, jak do wody szło doloć soku. Abo takigo swojskigo zrobionego na podzim do krauzów, abo ańfachowego ze sklepu.  

Prawdziwy kompot - oczywiście fest zimny, taki ze lodówki - tyz sie nadowoł, coby dobrze ugasić pragniynie. Nojlepszy z rabarbaru, ale tyn sie wartko psuł i potym scypało w jynzyk. Ja, smaku zgerowanego kompotu z rabarbaru niy zapomna. Dobry boł tyz kompot ze podzimek - samych abo cuzamyn z wieprzkami. Niy wiym, jak wy, ale jo móg wypić takigo choby i kibel. 

Bez hica fest mie za bajtla kusiły rzecy do picio ze sklepu. Smak cytronety durś pamiyntom i musa pedzieć, co dzisiejszo fanta trocha gorszo. Nojlepsze oranżady szło dostać we bronotnych i zielonych flaszkach u prywaciorza, ftory mioł hurtownia. Loł do tych flaszek trzi zorty oranżady: cerwono (tako dzisiejszo Helena), zielono i żółto (trocha jak fanta).  I oczywiście niy sprzedoł wom nicego, jak niy prziniyśliście flaszek do łoddanio ze sobom. 

Jak zech chodzioł do podstawówki, to na sztandach zacli sprzedować oranżady (ale take lipne, bo bez gazu) w nylonbojtlach. Dostowało sie do niego szpicato na jednym końcu słomka, robioło dziura we bojtlu i piyło. Boże, jak to smakuwało. A na koniec bez ta słomka plompało sie pusty bojtel i go mocno deptało, coby sie łozerwoł z fest larmym. 

Niy idzie niy spomnieć ło saturatorach. Jedyn z nich stoł zowdy we Bytoniu na placu Sikorskiego, tam kaj przistanek bany szóstki. Ze saturatora szło dostać sama woda ze gazym, abo woda ze gazym i sokym. Sprzedowali jom we szklonkach wielorazowego użytku, nojcynści chyconych ketom, coby żodyn niy ukrod i niy strzaskoł. Sanepid na to niy dowoł pozór, a szklonki myło sie byle jak. I niy ma sie co dziwać, co jak przed wami we raji stoła baba, to mogliście dostać szklonka ze śladami lipynsztifta.