Co wy wiycie ło prawdziwy ciśbie

Zresztom tam majom cyntra przesiadkowe, a niy dworce. i u nos tyz bydzie cyntrum. A widzieliście plac, tyn za budkami z jedzyniym, na ftorym autobusy, ftore przijyzdzajom sie zaczimujom? Dyć tam wiecnie jest hasiok. Ftoś tam roz casu sprzonto?

Do samych autobusów nic niy mom. Niy ma ciźby, casym jak jest gorko, to nawet klima włonczom (ale po prowdzie jakoś tak dziwnie ino we tych autobusach, co jadom do Altreichu), a zice niy som potargane i pomarasone. Idzie na nich siedzieć nawet w nowym jasnym ancugu, abo fajnym klajdzie. No, ale jo jest naucony jeździć takymi autobusami z lot dziewiyńćdziesiontych i może być tak, co na mie bele co robi wrażynie i bele co mi styknie.

Downi jak sie jechało, to ciźba, a w zasadzie presa była durch. Ludzie ciśli sie jak bratheringi we biksie, jedyn drugymu siedzioł na klinie, a jesce sie raduwoł, co niy musi stoć. I wydawało sie, że juz żodyn niy wlezie, ale kaj tam. Ci co stoli na przystanku, a koniecnie chcieli jechać, ryceli do tych, co juz byli we środku: "Pociście sie tam jesce, dyć jest kupa placu". I richtich za kożdym razym jesce pora ludzi wlazło, ino potym niy szło drzwi zawrzić i zaś kierowca sie ciepoł. Zresztom fto downi jeździoł ze Bytonia do Katowic autobusami A abo B, tyn zno definicjo ciśby. Idzie to tak: Ciśba je wtedy, jak we autobusie dźwigniecie nogi i sie niy łobalicie. Na liniach A i B to zowdy działało: nogi we lufcie, a cowiek stoi, bo go na bokach czimajom.

Dzisioj jak zech pedzioł presy niy ma, ale niy myście sie, co zowdy bydziecie mieć plac do siedzynio we autobusie. Zice som durch zajynte przez modzioków, takich ze szkoły średni. Zmyncyni po szkole musom siedzieć, starszym niy wstanom, a nogi czimajon na drugym zicu. A nie próbujcie im co pedzieć, bo bydom zdziwiyni, ło co wom sie rozchodzi. Ło kule, chyba zech jest blank stary, co pisa take rzecy.