Tyn łobrozek spomnioł mi sie jak zech łoglondoł w TVP biesiada ślonsko nakryncono we Rybniku. Jom tyz jak nic musioł narychtuwać ftoś, fto miyszko we Warszawie i ło Ślonsku wiy tela, co usłyszoł. Abo łobejrzoł we innych programach zrobionych przez takich jak łon. Bezto wszystko wyglondało tak: na binie za stołami siedzieli ludzie: baby przeblecone za chopionki (oczywiście we paniyńskich wionkach na gowach nawet jak były 50 lot stare), a chopy w mudurach górniczych. Razym tańcuwali, kolybali sie i śpiywali. Toz kożdy wiy, że gynał tak wyglondo u nos fajer i wszyscy tak sie łoblykajom na beztydziyń. Ino cymu na stołach niy widzioł zech modry kapusty z tartymi kluskami, kołoca i krupnioków, nojlepi na jednym talyrzu? I żodyn niy godoł: "Pieruna". Trudno, darmo. Jak to pedzioł Wąski we filmie "Kiler": "Pewne niedociągnięcia są".
Ci co fajeruwali tańcuwali do piosynek ło Ślonsku, a śpiywali je dyżurni piosynkarze, ftorzy sie tu rodzili i poradzom po naszymu pedzieć aby jedne słowo, abo sie im tak zdo. Jak zowdy. Kozom rychtuwać program ło Ślonsku, to bierymy heft, łotwiyromu na cajcie "Śląsk" i dzwoniymy do tego i do tamty, a łoni juz zrobiom reszta. Przeca som ze Ślonska - z Byndzina i Czeladzi, a to gynał Ślonsk. Godocie, co niy? Dyć łoni we Warszawie chyba lepi sie znajom, toz sie nie wadźcie.
Niyftorzi śpiywali fajnie, niyftorzo niyfajnie. A jedyn chop - noprowdy nasz, co sie mianuwoł Wesoły Masorz śpiywoł łokropnie. Chycioł sie łon za przebój Budki Suflera "Jolka, Jolka pamiętasz", ftory przełonacoł na ślonski. Ale jak! Było coś ło babie ftoro łon by proł i broł abo na opy, bo juz niy pamiyntom. Ale jak widać tekst fest fajny i pieronym mondry. A jaki życiowy. We Warszawie musom mu dać medal, bo pokozoł, że to, co łoni sie tam ło nos myślom, to jest cołko prowda. Bo u nos Wesoły Masorz medalu niy dostanie. Ale wiecno gańba mo na zicher.
I jesce jedno. Za Ślonzocka robioła tam Anna Popek, baba ze Bytonia. Tyz sie wpasuwała jak cza. A jak echt po naszymu, z takym akcyntym ze Karbia, abo Łagewnik godała: "A idź żesz ty", to az zech mioł płacki we łocach i hercklekoty. I jak to pisa, to durś je mom. Musa końcyć, bo mi na klawiatura kapie.
Komentarze