Wiyncy jak dwa lata nazod we bytomskym urzyndzie miejskym zacli łozdować szoferom plastikowe romki na tabule rejestracyjne do autów. Bardzo fajne, inksze jak te z numerami telefonów dilerów samochodowych abo z nazwom firmy ubezpieczeniowy. Łone miały za to hasła reklamowe, co je noprzód we internetowym głosuwaniu miyszkańcy sami wymyślyli. Hasła som dwa, możno je sami wozicie na aucie, możno mo je wasz somsiod, a juz na pewno musieliście widzieć, jak inni sie je przychycili. Piyrsze to: "Bytom uśmiecha się do ciebie", a druge: "Z drogi śledzie, Bytom jedzie". I pozytywne, i wicne.
Kożdego dnia jak jezdza po Bytoniu, to dowom pozór na te romki i myśla, jakie inksze szłoby jesce wynokwić. Pora propozycji mom. Zdo mi sie, coby pasuwały take łoszczegawcze: "Ponknij sie, bo ciśnie baba/chop ze Bytonia", abo "Dej pozór, Bytoń ciśnie". Takie romki jak nic robiołyby wrażynie na inkszych kerowcach. Fto wiy, możno by posuchali i zrobili trocha placu. A juz na zicher by sie wartko cofli, jakby lobejrzeli romka z krótkym pytaniym "Kaj sie ciśnies?". Szloby tyz przi okazji postarać się trocha ło prewyncja i bezpieczyństwo i napisac na romkach: "Na co sie tak uwijos?" i "Kaj to paczis, dowej lepi pozór na droga". Jakby to fto przecytoł, to zaro by sie spamiyntoł. Oczywiście stare: "Uwaga, uwaga, bo jedzie rolwaga" tyz bołoby fest dobre.
Cza by tyz pomyśleć, co z Radzionkowym? Jak majom tam srogo Grupa Cidry Lotajom dlo tych, co som radzi lotaniu, to na tabula rejestracyjno mogliby dować romki: "Cidry jezdzom". A jo dołbych tyz take: "Cidry dowajom ci kusika" i trocha w stylu bytomskich śledzi: "Jedź no warci i sie stroć, jadom Cidry - majom moc".
A jak juz tak godomy, to pamiyntocie, że jesce downi modne boły romki z hasłem "Wal śmiało, auto teściowej"? Ludzie sie śmioli, ale wypadków niy robili, bo fto by chcioł sie zrombać auto skuli cyjiś teściowy? Chyba ino tyn, fto chciołby komus zrobić przyjymność. No, ale co jak som jechoł autym pożyconym łod swoji teściowy? Niy, to niy możliwe. Teściowo żodnymu auta by niy pożycała.
Komentarze