Możes tu być, sztrykuwać i szyć

Ludzie niy wyciepywali wszyskigo jak dzisioj i to niy skuli modny terozki ekologii. Po prowdzie byli szporobliwi, szanuwali to, co majom, a zresztom we sklepach niywiela szło dostać. Ficuwanie to cerowanie, a żeby ficuwać musicie mieć ficuwacka, czyli tako ekstra nadla (igła). Dzisioj juz mało fto sie za to chyto, bo sie niy werci, czyli nie opłaci. Zresztom, fto by tam lotoł we poficuwanych fuzeklach? Łachy som tonie, a we szmateksie kupicie i to take richtich fajne i casym nawet nowe za pora złoty. Ja, ficuwanie niy mo prziszlości.  

Dobrze - przinajmi u nos - czimie sie za to hekluwanie, a więc szydełkowanie. W Pałacu w Miechowicach łod downa możecie sie zapisać na warsztaty z hekluwanio. Baby ftore tam łazom uhekluwały juz łoblycki na ławki i dach, ftory powiesiły nad ulicom Gliwicką. Warsztaty prowadzi Elżbieta Salamon-Cygan, ftoro współpracuje tyz z Fundacją Oko w Oko z Rakiem. Cuzamyn z innymi uczestniczkami chodzi łona na Oddział Onkologii Klinicznej w Wojewódzkim Szpitalu Specjalistycznym nr 4 i namowio pacjyntki, coby chyciły za heknadla (szydełko). Ponoć to uspokajo i funguje jak terapio.

Momy jesce tyz sztikuwanie, a więc wyszywanie. To juz blank niy ma łatwe, choć na zicher tyz poradzi uspokoić jak fto nerwowy. Ale niy kożdego. Jak za bajtla we szkole na zajęciach praktyczno-technicznych kozali nom sztikuwać, toch sie nerwuwoł jak mało kej. A moje sztikuwane kwiotki pani pokazuwały innym i godała: "Tu mamy przykład, jak się tego nie robi".