Nikaj niy ma takigo torgu, jak we Cidrach

Mie sie z tym srogym placym przi ulicy Unii Europejski kojarzom take czi sytuacje-łobrozki. Po polsku powiedzieliby, że radzionkowski targ to miejsce kultowe. Po ślonsku cza by pedzieć, że w Cidrach majom ekstra torg. Taki, jakigo niy ma nikaj indzi. I dejcie pozór: to jest gynał torg i inacy nawet niy godejcie, bo bydziecie sprzezywani. Jo wiym to dobrze, bo za modych lot piosołzech w naszym cajtongu ło tym miejscu.

Niy pamiyntom już skuli cego, ale to niy ważne. Chcioł zech, coby w tekście niy powtorzoł się wyraz "targ", tuz napisołzech pora razy "radzionkowski bazar". Niudugo potym trefioł mie burmistrz Radzionkowa, a boł nim Gustaw Jochlik. Fest znerwuwany pedzioł mi tak: "Bazar to majom we Warszawie. My momy torg". 

Jak torg je ważny i jak ludzie z Cidrów majom go we zocy, przekonołech sie roz casu jak we Radzionkowie trwała kampania wyborcza. Kożdy fto startuwoł na burmistrza powtorzoł, że jest stond, że tu sie urodzioł, tu końco szkoła, że tu łazi do kościoła, a we sobota idzie z babom na torg. I co bez ty rajzy sobota jest niyzaliczono. We Bytoniu żodyn kandydat taki deklaracji niy skłodoł, choć na targowiskach (w Bytomiu są targowiska) kampania była prowadzona.

A pamiyntocie, jak dwa lata nazod bez pandymia burmistrz Gabriel Tobor musioł zawrzic torg, bo take boły przepisy? Coz to sie roibioło? Ludzie łazili jak bamontni i cekali, kedy zas bydom mogli kupuwać. Dyc ło tym nawet piosynki śpiywali we internecie. Łukasz Wylężek nagroił taki rapuwany konsek,we ftorym godoł, a po prowdzie apeluwoł do burmistrza tak: "Dom ci ziymi siedym morg, prosza Gabryś łotwórz torg". No i co, mom recht, co takigo torgu niy ma nikaj indzi?