Skońcie z politykom i dejcie sie zaszklić

Wydowac by się mogło, co we taki sytuacji we wyborach samorządowych Ślonzoki tyz łod downa piyrszy roz w końcu coś ukulajom. I tak by boło, jakby politykom u nos zajmuwali się ludzie mondrzy, a zocni, a nie take lebry i stare ułty, co ino paczom jak zrobić cyrkus.  

Niy cza boło dugo cekać: jedni dostali 2 procynt, drudzy 3 i zaś porażka, ale tako fest. Bezto musa wom coś pedzieć, choć wiym, co ani niy posuchocie, bo sie robicie ważni jak magi we zupie: robicie ino łostuda i gańba i to pieronowo. Ślonzoki Razem i Ruch Autonomii Śląska: dejcie sie pokój z politykom i dejcie sie zaszklić. Niy poradzicie sie dogodać, łod downa wystowiocie we wyborach tych samych ludzi, na ftorych żodyn już nie chce paczeć. Idźcie juz na pynzyjo, a do przodu dejcie ludzi mondrych i modszych. Wy juz nic dobrego niy zrobicie. Zresztom, RAŚ nawet kedyś rzondzioł na Ślonsku i co? Co z tego łostało? Ino pamiynć po kaspruwaniu jego szefa.