Po zupie dymfowane kartofle, a ku niym piecono na maśle ryba i do tego uwarzono bioło kiszono kapusta z grzibami, abo kapusta z grochym. Żodnych pierogów! Musicie wiedzieć, co łonych w ogóle w ślonski kuchni niy treficie. Cas na kompot, abo jak niyftorzi godajom komport uwarzony ze suszonych śliwek. Dali tyz na słodko. Zacynomy łod makówek. Noprzód musicie dac do piekarza zmielić mak, abo zrobić to sami. Mak cza uprażyć razym z bakaliami i miodym, potym dodowocie namocone we mlyku abo we wodzie plasterki żymły, abo cwibaka (sucharków). Makówki rychtujymy we srogi asjetce (salaterce), a jak chcecie to na wiyrchu do ozdoby sujecie kokos i ukłodocie we wzorki mandle (migdały). Jo wiym, że po tym wszyskym brzuch jest juz połny, ale do mie niy ma Wiliji bez mocki. To deser z rozmoconego piernika, ciymnego piwa, bakalii i kompotu z wiśni. Miyszocie to w gorku, nojlepi srogim (jo rychtuja siedym litrów i to dwa razy), ale niy warzycie. Podować mocka cza na zimno!
Po Wiliji cza iś na pastyrka, to zresztom sama uciecha. Powitać nowonarodzonego Jezusa, pośpiywać kolyndy, porzykać, trefić innych ludzi no i łobejrzeć kościelno betlyjka (stajenkę). Tako mało kożdy mo w doma, a nojlepsze w Bytoniu i wcale niy małe, a raczy sroge na pół izby łod lot rychtuje Alfons Ficner z Kolonii Zgorzelec.
A Święta Bożego Narodzenia to po naszymu Gody, abo Godnie Świynta. Życa Wom na nie wszyskigo nojlepszego, Niych Dzieciontko Wom błogosławi!
Komentarze