Tyta połno maszkytów

Nazwa niy wziona sie znikond. Róg obfitości momy przeca w mitologii grecki. Mody Zeus pobłogosławioł ułomany róg kozy Amaltei i skiz tego kożdy, fto go potym czimoł móg sie zażycyć, coby tyn róg nafoluowł sie cym tam ino chcioł. 

Ślonzoki tradycjo dowanio piyrszakom tyty erbli downo tymu z Niymiec. Na poczontku robiyli to dziadki abo potki. Rechtory wiysały tyta na drzewach, a bajtle musieli jom ściongnonć tak, coby sie nie zniscyła. Tak mieli pokozać, co nadowajom sie do szkoły. 

Downi tyty robiolo sie samymu, a z biydy foluwało sie je noprzód papiorami, a dopiyro na wiyrch suło sie bombony, nojcynści szkloki. Kaj by tam fto mioł na szekulada abo jake batony. Niyftorzi wrozali do środka tyz filoki, tuśki, hefty i inksze klamoty poczebne we szkole. Jak jo szoł do piyrszy klasy, a boło to w roku we ftorym generał w ciymnych brylach zacon wojna z Polokami, tyz my mieli biyda, bo maszkyty sprzedowali ino na kartki. I zaś cza boło ciś do tyty papióry. Chyba, że fto dostoł pakyt z maszkytami z Efu. 

Teroz tyty sprzedowajom we sklepach. Kolorowe i nojcynści ze wzorami i to jakimi ino byście chcieli. Jak mocie bajtla, co lubi Avengersów, to bierecie tyta z Batmanem, Spidermanem i Kapitanem Ameryką, jak woli Ninja, to z Colem, Zane lub Niyą. A jak dziołchy chcom z jakom ksiynżnickom abo z Elzom, to dostaniecie tyta z ksiynżnickom abo z Elzom. Inksze tyz som. Widziołech nawet tako ze zdjynciem ucznia, widać co obsztaluwano. Małe, sroge i blank sroge. Abo puste do nafoluwanio, abo juz furt pod wiyrch nafoluwane roztomajtymi maszkytami. A jakymi! Tyty połne som szekulad, ciastek, lizoków, miśków, roztomajtych bombonów, gum do żucio i inkszych słodkich, a nic niy zdrowych rzecy.

Dumne bajtle idom z tymi tytami do szkoły, a potym koniecnie sie śniymi knipsujom i asom przed drugiymi. A jak ftorty jest niy za srogi, to tyta mo wiynkszo łod siebie i ledwie jom niesie. I wyglondo to bardzo fajnie.