W zasadzie ten tekst powinienem napisać w całości po polsku, bo tak najlepiej i w tym wypadku najbardziej skutecznie mógłbym odpowiedzieć na pytanie, które brzmi: "Czego Ślązacy nie lubią". Ale jak mo być po naszymu, to po naszymu. Cymu Ślonzoki niy som radzi? A choby tymu, jak sie ich robi za śmiysznych dziwoków. A wyglondo to tak: trefi mie ftoś, fto niy poradzi po ślonsku i zaro godo: "Powiedz coś po śląsku, to takie śmieszne, kiedyś w takim jednym kabarecie słyszałem i tak się uśmiałem". I wtedy jo musiołby pedzieć tak:

Jesce gorzi, jak ftoś chce sie poasić i som godo po ślonsku, abo zdo mu sie, że to robi, a noprowdy niy poradzi. Teroz mogymy to roz a dobrze pedzieć, a ju nojbarzi reżyserom co sie im wydowo, że robiom ślonskie filmy, a aktorzy godajom w nich po ślonsku. Niy ma takich słów jak "pierunie" i "pieruna". Godo sie "pieronie", ale niy tak bele kej, żeby ino coś pedzieć, to nie jest śląskie zawołanie. I ślonsko godka nie polego na tym, że kożdo litera "a" we wyrazie zamiynicie na "o". "Szafa" po śląsku to nie "szofa", a tramwaj to nie "tromwoj". I niy som my radzi, jak ftoś chce sie poasić i godo: "W antryju na bifyju stoi szolka tyju", a zaro potym rychtuje sie na to, że padnymy z wrażynio. Bo to zdanie niy mo wiynkszego synsu, a ino rym. Żodno szolka we antryju na bifyju niy stoi. Po polsku to zdanie znaczy bowiem: "W przedpokoju na kredensie stoi filiżanka herbaty? A mocie we antryju bifyj i czimiecie na niym tyj?  

Niy som my tyz radzi, jak we telewizji, radiu, abo cajtungu ftoś zacyno informacjo tak: "W Sosnowcu na Śląsku...", abo "Zamieszkał na Śląsku w Będzinie". Jo wiym, że Brynica to rzeka, co sie jom przeskocy, ale jednak jest i granica miyndzy Ślonskym, a Zagłymbiym wyznaczo. A jak już godomy ło mediach, nojbarzi tych ze Warszawy, to dobrze, żeby sie tam kapli w końcu, że niy wszyscy miyszkomy we familokach i robiymy na grubie, górnicy na beztydziyń nie łazom po ulicy w mundurach i czakach, baby nie warzom kożdego dnia klusek i rolady z modrom kapustom, a Ślonzoki to Ślonzoki. Niy Niymce.