Fortum złonacy sztromohajcownio

Ło swoich planach na zaś firma dała znać na konferyncji prasowy, ale taki cołkiym inny, bo godało się tam  ino po naszymu. Ta konferyncjo łodbyła sie w łostatni cwortek we bytomski knajpie „Świetlik”. Prowadziyli jom prezes Fortum Piotr Górnik (tyn chop fest dobrze godoł po naszymu, zaroz widać, że Hanys) oraz Marek Szołtysek, ftorego wszyscy znajom skiz tego, że łod downa pise łon ksionżki po naszymu.

 Dzisioj Finy robiom hajc w sztromohajcowni we Miechowicach. Pora lot nazod kupiyli jom łod państwa. Jest łona juz blank staro i czeba coś wartko zrobić, bo bez tego musieliby jom hnet zawrzić. Skuli tego Fortum fes inwestuje. Ino latoś do na miechowicko sztromohajcownio aże 20 miliunów złotych, za ftore zrobi nowe kotły szczytowe.   

Finy fest majom w zocy ekologio i chcom zrobić, coby luft we Bytoniu nie boł tak zmaraszony jak dzisioj. I nie ma sie co dziwać, że taki jest, jak u nos 46 procynt ludzi hajcuje w doma wonglym. Skiz tego momy roztomajte choroby i wiyncy umrzików, niz kaj indzi. Bydzie lepi, jak w Zobrzu Fortum złonacy sztromohajcownio. Ftoś sie na pewno spyto: cymu akurat tam, a niy u nos? Prezes Górnik godoł, że tam majom srogi bauplac i pozwolynie na budowa, a – co nojważniejsze – w Zobrzu gruba nie fedruje i nie łonaczy szkód, ftore mogłyby fest napaskudzić.   

Budowa sztartnie na bezrok, a wszystko mo być fertich w roku 2018. Fortum zabuli za to wszystko 870 miliunów złotych. Musicie wiedzieć, że sztromohajcownio bydzie fest nowoczesno. Do luftu dostanie sie dziesiynć razy mni tlynku siarki, niz teroz. Mni bydzie tyz innych marasów, ftore nom pieronowo szkodzom. Cymu tak sie stanie? Bo hajc bydzie niy ino ze polynio wonglym, ale tyz z polynio biomasom i innymi ekologicznymi paliwami. 

Hajc z Zobrzo do Bytonia poleci lajtongiem, czyli rułami do pociskanio ciepła, ftore czeba dopiyro zbuduwać. A roboty jest w pierony. Bydom łone dugie na wiyncy jak 10 kilometrów. Roztomajte inżyniery wyrychtowały juz projekty techniczne tych ruł. Fortum skorzysto z sieci Przedsiębiorstwa Energetyki Cieplnej. ton