Jak niy chycić rymy?

Niy godom, coby tam zaroz lazić w barchanowych batkach, bo to może źle wpłynonć na wasz zwionzek, ale ciepłe, nojlepi sztrykuwane fuzekle moglibyście sie kupić. Chyba, że juz mocie, boście dostali na łostatnie Dzieciontko.

Z tych samych powodów do spodnioków tyz niy namowiom, a chopów do rajtuz to juz wcale. Za bajtla bez zima (a downi to boły fest zimy, niy to, co teraz) mama kożdego dnia rano rychtuwała mi na stołku rajtuzy, cobych je łoblyk do szkoły. Ale jo ich niy broł, bo mie boło gańba. W szkole przed chopcami cza boło dżwignonć nogawica łod galot i pokozać goło noga. Kożdy sie tak asioł. A jak fto jednak mioł spodnioki abo rajtuzy, to boł przejechany. I fest sie śniego śmioli.

To, co w końcu łoblykomy na to zimno? Watuwane galoty, ruby cwiter, a pod niego nojlepi jaki tres, mycka na gowa, szal i glazyjki. Do tego rubszy mantel, albo jesce lepi pelc mantel - ino wyluftujcie go noprzód, coby niy wonioł naftalinom. Szczewiki tyz by cza jake lepsze, take na rubym zolu. Ino niy kupujcie ich dzieciom jak mocie take w łostatnich klasach podstawówki abo we szkole średni. I tak niy bydom w nich łazić. Jo widza, co teroz modzi nawet jak jest minus łosiym, abo i wiyncy to i tak łobuwajom adidasy, abo jake inksze sportowe szczewiki, a galoty sie jym zacynajom nad kostkom, jakby woda mieli we pywnicy. Tako moda, nic niy poradzicie. A co bydom na starość żałuwać, jak ich pokrynci, ani jym niy godejcie. To tyz niy pomoże. Zresztom wetna sie, jak wyście byli tacy starzi jak wasze dzieci dzisioj, to tyz nie chcieliście łoblykać rubych łachów (jak jo tych spodnioków) i łaziyliście z gołom gowom.

A co jak jednak wos przewieje i dostaniece ryma? Zaro sie zróbcie gorki tyj, wciście cytrona i miód. No dobra, jednego możecie wloć. I nojlepi wygrzoć sie pod dekom. Jak boli gardło, to do cyckanio nelki - lepsze jak te wszyske reklamuwane pile. I jesce możecie we tosterze (bo fto mo dzisioj blacha?) upiyc sznita chleba, posmaruwać jom coskym, posolić do smaku i zjeść. Ale potym z żodnym niy godejcie. Czimcie sie ciepło, wiosna hnet.