Chopy idom do Piekor

Ci z Bytonia i ze Radzionkowa majom blisko, jak sie uwinom, to za dwie godziny bydom na miejscu. Ale przeca przyłazom tyz chopy z daleka: z Katowic, Tarnowskich Gór, Mysłowic, Chorzowa. Nojcynści idom piechty, ale mocka tyz przijyzdzo na kołach. Po drodze rzykajom różaniec, śpiywajom i łosprawiajom. A potym wszyscy trefiom sie na Kalwaryjskim Wzgórzu. I niy ma na Ślonsku wiynkszego skupiska chopów, jak właśnie tam. Sto tysiyncy ledwo sie mieści na srogi przeca górze. I możecie mi wierzyć: jak łoni wszyscy łoroz zaśpiywajom "Matko Piekarska, opiekunko sławna, orędowniczko wszelkich łask", to niy idzie zaczimać płacków, a serce gno jak cug.

Chodza na ponć do Piekor łod bajtla. Jak tak rachuja, to boł zech tam juz jakieś 40 razy. Noprzód jako ministrant, roz nawet nios zech krziż i cuł zech sie ważny jak magi w zupie. Potym zawsze szoł zech z ujkiym-potkym i dziadkym. Niy zapomna tego nigdy. I mom nadzieja, że mój syn z ftorym piyrszy roz poszoł zech na ponć jak jesce boł we głymbokym wózku, tyz bydzie pamiyntoł. I to niy ino skuli tego, co po mszy idymy na budy kupić makrony, futermeloki, żelowe szlangi i jakoś drogszo niz we sklepie zabawka, ftoro na zicher zepsuje sie jesce tego samego dnia.