Ale niy moga nic niy napisać ło tym wszyskym, co sie stało juz po decyzji prezydenta, bo dzioły sie rzecy niymożliwe. Znerwuwali mie politycy Platformy Obywatelskiej. Łoroz zacli przoć Ślonskowi, łoroz kożdy naucył sie godać i kożdymu zrobioło sie żol Ślonzoków. Ale po leku! Przeca wceśni boło siedym prób załatwiynio ty sprawy! Przeca w latach 2010-2015 PO miała swój rzond i swojigo prezydynta. Mogła robić co ino chciała. I co, jakoś ustawy żodyn w tamtym casie niy napisoł i niy przecis bez parlamynt. Możno skiz tego, co Bronisław Komorowski, ftory boł tym prezydyntym dzisioj ło jynzyku ślonskym godo echt to samo, co Andrzej Duda?
A na koniec wyskocyły jesce kaspry z Ruchu Autonomii Śląska. Działajom łod 34 lot, ale teroz spomniało sie jym, ło autonomii. Jerzy Gorzelik nazywo to "załatwiyniym odrębności etnicznej". To coś ło wiela wiynksze, jak jynzyk regionalny. No niy wierza. Ftoś niy poradzi wlyź na piyrszy sztok chałpy, ale godo, co wskocy na dach. I fto to godo? RAŚ? Dyć wiyncy babów - i to modych - powiy, co jo jest szfarny (możno nawet ze śtyry sie znońdom), niz łon mo wyborców. RAŚ nic niy znacy, niy poradzi nawet dogodać sie z inkszymi ugrupowaniami przed wyborami, a chce sie brać za take rzecy?
0
0
0
0
0
0
Brak komentarza, Twój może być pierwszy.
Dodaj komentarz