Co niy Ślonzoków dziwi na Ślonsku?

Niy roz i niy dwa trefiołech takich ludzi. Po latach suchanio ich moga zrobic lista rzecy, ftorfe nojbarzi ich zaskocyły, a dokładni lista wypowiadanych w takich momyntach zdań. Piyrsze: "Nie wiedziałem, że macie tu tyle zieleni. Myślałem, że Śląsk jest czarny, bo przecież te wszystkie kopalnie i huty tak kopcą i smrodzą". Jak to słysza, to chce mi sie śmioć, bo przeca gruby i huty downo pozawiyrane, łostało ich ino pora. Ślonsk jesty dzisioj zielony, wejrzijcie sie, wiela momy tu rezerwatów. W samym Bytoniu możecie sie luftnonć i poszpaceruwać, cy tyz karnonc na kole w Segiecie, abo na Żabich Dołach. No i jesce momy park w samym środku miasta choby w Nowym Jorku.

Zdanie druge: "U was nie można się zorientować w jakim mieście się aktualnie jest, bo jedno przechodzi w drugie." To prowda. Jadymy z cyntrum Bytonia ulicom Strzelców Bytomskich. Za M1 skryncomy w prawo i juz my som w Radzionkowie. Ale ino na pora minut, bo zaro wjadymy do Piekor, a z nich zas nazod do Bytomia. Czi miasta, a przeca jechali my ino piytnoście minut i to poleku. Kaj indzi we Polsce tak niy ma. Tam mocie miasto, wsie, lasy, miasto wsie, lasy i tak durch.

Czecie zdanie: "Czemu wy nie obchodzicie imienin?" Bo świyntujymy urodziny. Ślonzoki tak po prowdzie to ani niy wiedzom, kej majom imieniny, bo ich niy uznowajom. Za to urodziny, czyli gyburstag, to jest fest ważne wydarzynie. A jak fto mo Abrahama (50 lat), abo inkszo łokrongło rocznica, to juz fajeruje na fest.

Pytanie cworte: "Dlaczego na śląskich imprezach najpierw podaje się ciasto, a dopiero potem inne dania?" Tak juz jest i tyla. Jak wos zaproszom po połedniu do ślonski chałpy na fajer, to musicie wiedzieć, co noprzód poczynstujom wos ciastym, zistom, kołocym, abo tortom i kawom. Dopiyro potym rychtujcie sie na zimno płyta, a już na som koniec na coś na ciepło. Jedyn chop godoł mi kedyś, co poszoł z babom na fajer i tyla, co wloz dali jym torta. Łoni to zjedli i zbierajom się nazod do dom, bo zdowalo sie jym, co to juz koniec. Bo u nich słodke jest na zakońcynie imprezy. Dopiyro gospodorz im wszystko wyforszteluwoł. Wrócili sie i spokojnie pojedli.  

A może dziwi wos jesce co inkszego? Napiscie mi prosza ło tym.