Ecik, kepa, tor!

Boł lipiec 1998 roku. Ło Cidrach, bo tak na klub godali pisały gazyty, a telewizje przyjizdzały tu nakryncić programy. Bo tego jesce niy boło: drużyna z małego miasta, z grocami ftorych niy chcieli kaj indzi i co nojważniyjsze bez pijyndzy, dostala sie na salony. I jak tam grała! W tym piyrszym szpilu Cidry naklupały Widzewowi Łódź 5:0, a musicie wiedzieć, co tam grali reprezyntanci kraju, chopy z fest nazwiskami.

Dwa tory szczeloł Marian Janoszka, na ftorego wołali Ecik. Tego po prowdzie pisać bych niy musioł, bo kożdy wiy, ale jakby tak modzi cytali, abo baby ftore nie som za fusbalym, to napisa: legynda Ruchu Radzionków. Jak sie broł za elwer, abo za rzut wolny, to torman móg juz sie dać pokój, bo Ecik zawsze trefioł. A z kepy jak szczyloł! Godali, co mocni, jak niyftorzy nogom. Janoszka na boisku łoskazuwoł i felezuwoł, a inni go suchali. Kibice na kożdym szpilu ryceli jego nazwiskoi i fest go mieli w zocy.

Z Ecikym Cidry w tym piyrszym sezonie skońcoły na szóstym placu w ekstraklasie - nojlepi ze ślonskim drużyn. Ale tyn śnik niy trwoł dugo. Niyskorzi boło juz gorzi. Ruch slecioł do drugi ligi, a potym jesce niży. Dzisioj gro we cworty lidze razym ze Szombiyrkami Bytom. Niy ma juz stadionu Cidrów przy ulicy Narutowicza (zowdy boł we Bytoniu, niy w Radzionkowie), bo go zbulyli i dzisioj tam som sklepy. Ecik poszoł na fusbalowo pynzyjo i robi na budowach. Ale ludzie durś go poznowajom, jak kaj idzie i chcom śniym godać ło tamtych casach. 

A jak ło Cidrach pisały gazyty, to casym boło z tego kupa śmiychu, bo wiycie, jak warszawioki paczom na Ślonsk - psińco sie znajom i niy roz godajom gupoty. Tuz roz jedna gazyta - downo juz ji niy ma - pisała, co na szpile Ruchu łazom nawet chopionki, a potym ło tym, łosprawiajom jak sie trefiom po mszy. Jo nawet wiym, co tyn dziynnikarz widzioł. Chopionki ze szalikami Cidrów stojom przed kościołym. Hyjdla pyto sie Any: Widziałach, coś wcoraj szła na torg. Ana na to: A dyć, kupiyłach miech łogórków, co by je zaprawić. Hyjdla: A wielaś krauzów zrobioła? Ana: Ani jedny, boch poszła na szpil. Cidry z Widzewym grały. Hyjdla: Ani mi niy godej, jo tyz z mojym poszla na szpil. A rycałach jak gupio. Ana: To tak, jak jo, a jak zech szalikym fyrtała, to mi aze jakla sleciała. Ale te łogórki dzisioj zaprawia. A dwie krauzy ekstra dlo Ecika narychtuja. To gyszynk za te dwa tory.