Kompot, czyli komport

Momy lato, kupa roztomajtych łowoców, tuz kedy ino idzie warza kompoty, bo fest zech jest im rod. Ale poleku. Pisa kompot, bo tak sie u mie godało, ale może ftoś z wos godo komport. Jak zech piyrszy roz usłyszoł tyn wyraz łod moji - wtedy jesce lipsty - toch myśloł, że łona sie łomyloła, abo powtorzo za swojom mamom (mojom teściowom), ftoro wynokwio nowe wyrazy. Jak my juz som przi jedzyniu, to teściowo niy godo pizza, ino piksa, niy łogórki, ino łogóry, a jak coś jest rzodke, to godo na to klit. A mie zowdy mianuwala Tomson. Jak to juz wiycie, to niy dziwujecie sie, coch w tyn komport niy wierzoł. I dopiyro niydowno moja ciotka, co jom znom śtyrdziści lot tyz łoroz tak sama łod siebie pedziala komport. Wceśni zech tego u ni nie słyszoł, ale to skiz tego, co my ło kompocie-komporcie nigdy niy godali. Nawet jak my go do łobiadu pjyli.

Ale miało być ło warzyniu, jeśli rychtuwanie kompotu-komportu idzie warzyniym mianuwać. Za bajtla nojbarzi zech boł rod kompotom-komportom z podzimek i wieprzków. Mama je zaprawiała bez lato, chowalo sie je we pywnicy, a zimom przynosioło do dom. Te wieprzki i podzimki cza boło wymiyszać, take boły nojlepsze. A słodki tyn kompot-komport boł choby szekulada z Efu. I jesce pamiyntom take kompoty-komporty na niby ftore dowali nom na koloniach: pofyrtano woda ze dżymym. 

Teroz jak som warza te kompoty-komporty, to już niy suja do nich cukru, bo mie tak naucyła moja, a łona jest fest za zdrowym jodłym i sie na tym zno jak mało fto. Zamiast tego wciepuja ruzynki, abo datle i tyz jest slodke. 

A z cego warza te kompoty-komporty? Z tego, co akurat idzie kupić na sztandzie. Podzimki i wieprzki dali som nojlepsze, ale rod zech jest tyz kompotom-komportom ze śliwek, porzecek, jabonek i cześni. No i jesce cza pedzieć ło rabarberze, ale jak warzicie coś śniego, to musicie ruzynek wsuć fest, bo inacy wos wykrziwi. 

Powiym wom, co nigdy mi sie niiy udo tych kompotów-komportów dać do krauzów i zaprawić. Nawet tych z wiśni, ftore przeca jak przidzie wilijo byda poczebuwoł do mocki. Niy skuli tego, że niy mom pywnice i niy miołbych kaj tego schować. Miołbych. Ale zowdy wszystko łoroz wypijom.