Piekymy kołoc

13:36, 26.01.2024

Skomentuj

Niy ma cegoś takigo jak kołacz, choć ci co sie niy znajom gynau tak cynsto pisom we sklepach. A juz broń Boże niy godejcie na kołoc "placek", bo to gorzi jak łostuda. Kołoc to nojbarzi ślonskie ze ślonskich ciast, choć jo bych pedzioł nawet, co kołoc to niy ma ino ciasto. Kołoc to coś wiyncy. Kołoc, to kołoc. Tuz sie niy dziwejcie, co mo status potrawy regionalny i unijny certyfikat. I ino cekać, jak trefi na lista światowego dziedzictwa UNESCO. Zasłużył sie, zresztom bez kołoca dziedzictwo ludzkości niy bołoby we wercie.

Momy czi podstawowe zorty kołoca: z posypkom, z makym i ze syrym. Ale som tyz inksze, barzi zwionzane z porami roku. Możecie zrobić kołoc z ponkami, śliwkoma, rabarbarym i inkszym łowocym. Kołoc jy sie cały rok: na beztydziyń i skuli świynta. Niy ma na Ślonsku wesela bez kołoca, durś żywy jest zwyczaj, co modo pani na pora dni przed weselym łoznosi gościom weselnym i znajomym ftorzy na wesele niy przidom zawinione we fajny celofan sroge konski kołoca. Dostowo za to małe gyszynki.

Ale tu niy ma co dużo pisać. Tu cza podać recept na kołoc i to wersji łod moji teściowy z Radzionkowa, czyli nojlepszy. Choć niy, jest jesce drugi nojlepszy recept na kołoc - łod moji ciotki Anieli z Piekor. No dobra, łone som jednake.

Toz robiymy kołoc z posypkom i to dwukolorowom. Do zrobiynio ciasta musicie mieć: 40 dag mąki, 15 dag cukru, 3 żółtka, 5 dag masła. jedna szklonka mlyka, packa suszonych drożdży, a do tego szczypta soli. Posypka robicie z 30 dag mąki, 25 dag cukru, 2 żółtek, 25 dag masła, 3 łyżek kakao, cukru waniliowego i cukru pudru do posucio. Monka miyszocie z drożdżami. Dodowocie żółtka utarte z cukrym i sól. Potym zacynocie wyrobiać ciasto i po leku dolywocie mlyko. Na koniec idzie łoztopione masło i wszysko ugniatocie. Masa ftoro powstanie, dowocie do ciepłego, coby wyrosło i zrobioło sie dwa razy take sroge.

Teroz rychtujymy posypka. Łonczymy wszyskie cutaty (składniki), ale bez kakako i wyrobiomy ciasto. Robicie ś niego kula i dzielicie jom na pół. Do jedny czynści dowocie kakao i zagniatocie to. Ciasto drożdżowe wykłodocie na blacha, ftoro noprzód cza posmaruwać. Na góra ukłodocie roz jasny, roz ciymny paski posypki, lekko spłaszczając je w rynce. Idzie tyz chudno posypka zeczić na grałpie (tarce) na ciasto. Potym to wszysko musicie wrazić do bratruly i piyc na 180 stopni bez pół godziny. Jak kołoc sie łostudzi, to sujecie na niego cuker puder. Teroz zróbcie sie kawa i smacznego!

Śląski Bytom i Radzionków

Piekymy kołoc

Co sądzisz na ten temat?

komentarz(0)