Piykny jynzyk ślonski

Ślonzoki fest sie różniom łod Poloków i niy ma co sie tymu dziwać: momy inkszo historio, co innego my przeżyli, żyli my w innym świecie i co inkszego nos ukształtuwało. Niy byli my pod zaborami, niy szumiom nom we gowach wierzby z Mazowsz i niy wzruszajom łąki zielone szeroko na błękitnym Niemnem rozciągnione. To niy nasz świat. Niy momy romantycznych porywów, wolymy pozytywistyczno robota. Warszawa tego niy rozumiy, dlo ni Ślonzoki boły i durś som podejrzane. Bo może to jednak Niymcy i zaro wyciongnom fany z hakynkrojcami. Warszawa Ślonska ani trocha niy cuje. Bez to zaro na pocontku III RP postawili nom we Katowicach pomnik Józefa Piłsudskiego, ftory nic ze Ślonskym niy mo wspólnego. Chyba ino to, co prześladuwoł Wojciecha Korfantego. I mo Marcin Hałaś recht: jest tu w ludziach poczucie krzywdy, ale niy skuli tego som Ślonzokami i godajom po ślonsku.

W czynści tekstu ło jynzyku Marcin Hałaś dali atakuje. Dali łobrażo i błoznuje. Pise ło "zideologizowanych naukowcach, nazywo "pociesznym" burmistrza Radzionkowa Gabriela Tobora ftory przetumacoł ksiyngi Pisma Świętego na ślonski. Musa pedzieć, co mój redakcyjny kolega fulo jak gynś bez łeba. Ślonski spełnio wymagania definicji jynzyka: jest skodyfikowany, różni się łod polskigo, bo mo inne zasady słowotwórcze i inacy sie w niym łodmiynio słowa. Momy bogato ślonsko literatura (som nawet dwa słowniki chińsko-ślonskie), po ślonsku śpiywajom zespoły muzyczne (i niy som to szlagry!), używo sie go w mediach elektronicznych i skuli tego idzie, a raczy cza pedzieć, że łon żyje i sie durś rozwijo. Niy jest skamielinom. Po naszymu godajom modzi ludzie, na TikToku tyz. I bydom godać. Bo chcom, bo tak cujom. Nawet jak ftoś sie z tego wyśmiywo.