EZI - fusbaler wyklynty

Zaś wos dzisioj byda namowioł na to, cobyście łobejrzeli Teatr Telewizji w TVP1 - gynau ty, co to jom durś likwidujom i zlikwiduwać niy poradzom. We poniydziałek, 23 lutego ło pół dziewionty na wiecór pokozom tam sztuka "Ezi".

 Widziołzech jom na pokazie przedpremierowym i powiym wom jedno: werci sie i to fest. Ezi godali na Ernesta Wilimowskiego, nojlepszego fusbalera polskigo. Boł lepszy łod Roberta Lewandowskiego, Kazimierza Deyny i Zbigniewa Bońka. Za stary Polski z Ruchem Hajduki Wielkie (dziś Ruch Chorzów) śtyry razy mioł majstra i śtyry raz boł krółym strzelców. W jednym ligowym szpilu wciepnoł tormanowi 10 razy! A jak Polska we 1938 piyrszy roz grała na Mistrzostwach Świata, to we szpilu ze Brazyliom strzeloł 4 gole! Polska i tak przegrała 5:6, ale ło synku ze Ślonska godoł cołki świat. 

To teroz na zicher mocka z wos sie spyto: jak tym Wilimowski boł taki dobry groc, to cymu jo ło niym piyrszo roz słysza, a przeca fest sie interesuja fusbalym? Bo Ezi to fusbaler wyklynty, jak go mianuwoł pisarz Zbigniew Rokita, co to łazi na szpile Szombierek. Ezi bez wojna groł dlo Niymiec, po wojnie łostoł we Niymcach i do Polski juz niy przijechoł, uznali go tu za zdrajcy. Kej pominoł, PZPN niy wysłoł  nawet delegacji na pogrzyb, a przeca Wilimowski we polski reprezentacji zagroł 22 razy i mioł 21 torów (dlo Niymiec 13 torów we 8 szpilach).

    Scynariusz do "Ezi" napisoł Robert Talarczyk, dyrektor Teatru Śląskiego w Katowicach. Zacon łod prowdy, skońcył na fikcji. Prowdom jest, co przed szpilym Polska-RFN we półfinale mistrzostw świata we 1974 roku we hollu hotelu trefili sie Ernest Wilimowski i tryner naszy reprezyntacji Kazimierz Górski, ftory jak go kejś spytali, fto boł nojlepszym polskiym fusbalerym pedzioł: Wilimowski. Rozmowa boła krótko. Górskiego wezwali do telefonu, łon poszoł, a jak prziszoł nazod, Wilimowskiego juz niy boło. I tu sie zacyno fikcja stworzono przez Talarczyka, bo w jego sztuce Wilimowski i Górski dugo ze sobom łosprawiajom, pijom bimber, śpiywajom ślonskie i lwowskie piosynki. A  godajom tyz i ło tym (a to prowda), co Górski bez wojna groł we Dynamie Lwów, drużynie NKWD. Cymu? Bo niy chcioł, coby go wziynli do wojska. Skuli tego samego Wilimowski groł dlo Niymców. Górski jest bohaterym, żodyn mu nicego niy wypomino. A Ezi...

Dejcie pozór na tyn tyjater. Reżyseruje Janusz Zaorski, a grajom Zbigniew Zamachowski i Andrzej Chyra.