Niy wiym, cy zeście słyszeli, ale przed świyntami na Karbiu ftoś porwoł hazoki. Jak jo sie ło tym dowiedzioł, toch sie nojprzód ani trocha niy dziwuwoł. Pomyślołech sie, co ftos to zrobioł, żeby sie narychtuwać na Wielkanoc swojskigo leberwusztu. Ale niy, bo to niy boły takie żywe hazoki, ino drzewiane i do tego na kólkach. Take ozdoby, ftore razym z kolorowymi jajkami miasto postawioło we Parku Konopnickiej i na inkszych placach we cołkym Bytoniu. Wyglondo to niy nojgorzi, niy idzie pedzieć. Nojbarzi mi żol bajtli z Karbia, bo łone sie z hazokami knipsuwały i paczały na nie jak lotały na placu zabaw, a teroz majom psińco. No prawie psińco, bo po jednym hazoko łostało kółko.
Ale tukej sie nie ma co śmioć: sprawa jest fest poważno. Tak sie myśla: fto to porowoł te hazoki? We internecie ftoś napisoł, że możno wilk z ruski bojki "Wilk i zając" - tyn co durch rycoł; "Zajac, nu pagadi!", bo hazok robioł go za błozna. Jo w to ani trocha niy wierza. Dyć tyn wilk jest juz blank stary i niy w gowie mu take skoki. Choć z drugi strony po ruskich wilkach wszyskigo sie idzie spodziywać. Wszyskiygo nojgorszego.
Jakby to sie stało po świyntach, to bych podejrzywoł, że hazoki ze zymsty zebroł jakiś zawiedziony bajtel, ftorymu Zajoncek niy doł żodnego fajnego gyszynku, abo doł jaki lichy. No, ale to sie stało wceśni. No to może hazoki sie kaj skryły, bo boło im chodno - dyć niby kwieciń, a w nocy my mieli mróz? Tyz niy, hazoki som wyczimałe, a bez dziyń mogły sie łogrzoć, bo klara już świyci.
No to jak nic porwały je jakieś pierońskie gizdy, abo inksze łozarte lebry, co to ino łazom tam a nazod po Bytoniu, a pochajom. Abo to mało takich? Durch coś wyrobiajom, a kary na nich niy ma. Tu sczaskajom lampa, tu wybijom szyba, tam połomiom ławka, abo pomazom mur sprejym, kaj indzi zaś łobalom hasiok. Terozki połomały drzewiene hazoki, wciepły kaj do rantu i tyla. Abo spolyły je we piecu. Mom nadzieja, że Zajoncek do nich prziszoł i piznoł ich w te puste łeby. A jak niy, to na zicher Mikołoj im naklupie.
Komentarze