Jak jo chodzioł do szkoły

Ani my sie łobejrzeli i juz po wakacjach. Bajtlom, ftore niyrade poszły nazod do szkoły musa pedzieć, co dzisioj tego niy wiedzom i na pewno ani sie tego niy dadzom pedzieć, ale niyskorzi bydom spominały te szkolne casy bardzo dobrze, a może nawet nojlepi. Dyć chyba kożdy może to potwierdzić?

Data: 08.09.2024
Autor: Tomasz Nowak

Mie sie we szkole podobało. Do podstawówki zech chodzioł do Piekor. Juz ty szkoły downo niy ma, co jak sie spomna fest mie sztresuje, bo widza, jaki zech jest stary. We klasie wiyncy nos boło Ślonzoków, niz Goroli, ale rechtory niy dowali godać po ślonsku. "Mów ładnie, po polsku" - słyszeli my cynsto. No coz, szkoła boła polsko, to inacy chyba być niy mogło. Ucyłzech sie dobrze, ale roz skuli ślonskigo pani z polskiego dała mi niższo ocyna. Mielimy napisać wymyślone opowiadanie. Napiosołzech w mojym: "pies pociągnął mnie za nogawicę spodni". Ta nogawica, czyli po polsku nogawka pani pora razy podkreślyła cerwonym pisokym i za całe opowiadanie dała 4 zamiast 5.

Broić my we szkole brojyli, niy ma co godać, że niy. Ale rechtory na to niy pozwolały. Na przerwach we modszych klasach musieli my we parach łazić w kółko po korytarzu, na akadymiach stoć bez ruchu, a po lekcjach i przed niymi zakozywali nom grać we fusbal przed szkołom, bo: "wybijecie okna". Kozali nom snosić makulatura, ftoro potym zgniła zanim szkoła jom łoddała do skupu, jak my włazili do szkoły, to dowali pozór, cy tarcza jest prziszyto dookoła na rynkowie, a mundurek mo cysty bioły kragiel.

Za bele co dowali no roztomajte kary: uwagi do dziynniczka, stonie we koncie, abo zadanie: napisać sto razy "Podczas przerwy uczeń może przebywać w sali gimnastycznej jedynie w obecności nauczyciela". Byli tyz nauczyciele, ftorzy rubom lajstom prali nos po rynkach. Choćby za godanie na lekcji, abo jak fto niy poradzioł na pamiynć regulaminu pracowni. Żodyn niy lotoł skuli tego po telewizjach, ani do kuratorium. Uwagi we dziynniczku musieli my dać do podpisano łojcomi i rzykali my, coby niy dowiedzieli sie łoni ło inkszych karach, bo jesce w doma bołoby larmo.

Szkoła średnio to juz inksze casy. Ta moja to nojlepszo szkoła na świecie: IV Liceum Ogólnokształcące im. Bolesława Chrobrego, czyli Sikorak. Bardzo dobrze spominom rechtorów: byli mondrzy, mieli autorytet i życiowe podejście. Kej cza poważni, a kej cza poradzili błoznować. Dużo nos naucyli i przygotowali do studiów. Dobrze boło sie trefić sie śniymi rok tymu, jak moja klasa miała 30 lot po maturze.