Wodzionka

"Umm, wodzionka to nojlepszo z wszyskich ślonskich zup. Umm, wodzionka, jak jom zrobi moja żonka, to jest łósmy świata cud" - tak poranoście lot nazod śpiywoł zespół FEET, we ftorym groł chop ze Radzionkowa, Pyjter Feszter.

Data: 17.11.2024
Autor: Tomasz Nowak

Mogymy sie śmioć, że to ślonski szlager, ale łonego na YouTube łobejrzało do dzisioj wiyncy, jak 3,4 miliona ludzi. Mogymy sie śmioć, ale powiydzcie, cy znocie jakoś inkszo zupa, ło ftory śpiywajom piosynki? Jo niy znom.

A ło wodzionce nawet ciynżko pedzieć, co to zupa, bo łony sie przeca niy warzy. Recept mocie fest prosty, co już barzi niy idzie. Zresztom to nawet niy recept, ino trocha choby wzór chymiczny: H2O + łój + kromka = wodzionka.

Ale weznymy sie to po leku. Bierecie sznita, czyli właśnie ta kromka starego, twardego, cyrstwygo chleba, nojlepi żytniego. Krajecie go na drobno kostka i wciepujecie do talyrza, abo do taki wiynkszy asjetki (miseczki). Do tego chleba musi prziś drobno krajany cosnek - srogi zombek. Potym wciepujecie łyżka tustego ze spyrkami (dzisioj smalec, downi łój), dodowocie sól i wszysko zalywocie gorckym gorki, uwarzony wody. Chlyb wartko sie łozmocy, a tuste łozpuści, toz niy cekomy, ino drapko jymy.

Fest to jest dobre i to niy ino we smaku. Dyć wodzionka to samo zdrowie. Cosnek to taki naturalny antybiotyk, ftory zabijo bacile, czyli zarazki i rychtuje łodporność. Bez to dobrze jeść wodzionka teroz, kej na dworze coroz zimni i wartko idzie chycić ryma, abo jake jesce gorsze choróbsko. Bajtlom tyz łod casu do casu dowejcie wodzionka, to niyskorzi niy bydziecie musieli łazic ś niymi po dochtorach. Skiz tego cosku mogom ji niy chcieć za fest, ale możecie łobiecać jym, co jak zjedzom, to dostanom maszkyty.

Downi żodyn niy widziwioł i niy wynokwioł. Wodzionka boła u nos jodłym biydnych, szporobliwych i gospodarnych ludzi. Biydnych, bo jak widzicie dużo cutaty, czyli składniki na ta zupa niy kosztujom. A szporobliwych i gospodarnych, bo robioło sie jom ze chleba, ftory łostoł i juz zeschnoł, a przeca żodyn ani myśloł go wyciepnonć, bo to grzych.

I jesce musicie wiedzieć dwie rzecy. Piyrszo: wodzionka, to skarb i tajla kultury. Skuli tego juz downo znodła sie na Liście produktów tradycyjnych prowadzonej przez Ministerstwo Rolnictwa i Rozwoju Wsi. I drugo rzec: jak wybiyrocie sie na zolyty, planujecie romantyczny wiecór, abo po prostu idziecie do ludzi, to sie wodzionki niy chytejcie. Wiadomo: cosnek.