Polterabend

W zeszło sobota miołzech we moji familii wesele - Natalia i Dawid jesce roz wszyskigo nojlepszego, życa Wom cobyście sie zowdy przoli tak fest, jak teroz.

Data: 24.08.2024
Autor: Tomasz Nowak

Autor zdjęcia: Tomasz Nowak

A przed weselym na Ślonsku som jesce dwa ważne wydarzynia. Piyrsze to łozdowanie kołoca. Modzi jezdzom po rodzinie i znajomych i dowajom jym czi tradycyjne zorty kołoca: z makym, syrym i posypkom (pamiyntejcie kołoc, to kołoc, a niy ciasto). Fajnie spakuwane w zawionzany szlajfkom celofan, łozdobiony mertom i z małom karteckom, na ftory stoi napisano: "Aby nasi znajomi w pamiynci nos mieli, modo para łod serca kołocym sie dzieli". Ta merta możecie sie posadzić, a jak wom wyrośnie, to znak, co modzi bydom żyli szczynśliwie. Jak niy wyrośnie, to ani nic niy godejcie, a łoni i tak bydom szczynśliwi. Jak to we małżyństwie.

Pora dni przed ślubym, downi dziyń noprzód, przychodzi dran na polterabend. W tłumaczeniu z niemieckiego to głośny wieczór i richtich larma jest fest dużo. A wyglondo to tak: do chałpy mody pani prziłazom weselni goście, znajomi, somsiedzi i inkisi, nawet ci, ftorych sie niy zaprosiyło. Kożdy przynosi ze sobom coś z porcelany, abo glinki. Na Pomorzu, kaj tyz robiom polterabend przinosom jesce rzecy ze szkła, ale u nos niy, bo to może skludzić niyszczynście.

Mogom to być talyrze, szolki, asjetki i inksze take - trocha uczaskne tyz. Jak to fto mo, to przismycy cały ausgus. Tym wszyskym ciepie sie ło zol, coby to poczaskać. Musicie ino dować pozór, coby żodnego nie skalicyć i niy zniscyć chałpy. To czaskanie, robiynie jak nojwiynkszego larma przyniesie modym szczynście we małżyństwie, a kożdy wiy, co łone jest koniecne. Jak juz poczaskocie, coście tam przismycyli, to modzi ugoscom wos gorzołkom, piwym, kołocym i inkszym jodłym, teroz nojcynści robi sie grill. Som stołki i ławy do siedzynio, łozciongo sie paryzole, jakby tak zacło loć, gro muzyka. Czyli w skrócie: wy robicie fest bajzel komuś na placu, a łon wos niy przezywo, ino jesce czynstuje i dziynkuje.

Tego bajzlu jest za tyla, a durś go przibywo, bo goście durś prziłazom i ciepiom. Bezto modo pani musi razym z modym panym chycić sie sipy i mietły, zamiatać i sprzontać te poczaskane tajle, a potym wciepuwać je do hasioka. A coby niy boło to take proste, co ino modzi pozamiatajom do hasioka, to inksi tyn łasoiok łobalom, wszystko wysujom i zaś jest mocka roboty. Tak może być bez końca, toz modzi jak ino mogom, chowajom połne hasioki do chałpy, piwnicy, garażu i kaj ino sie do. A goście i tak je znojdom, nawet jak som kaj zawarte na kluc i zaś wszysko wysujom.