Klara świyci coroz mocni, pomału robi sie hica, tuz niy ma co siedzieć w doma, ino cza wylyź na plac. Tym barzi, że momy majówka. Ale kaj tu nojlepi wylyź? Kożdy jest rod innymu miejscu, kożdy mo swoje ulubione.
Jo sie bardzo dobrze cuja na Ksiynży Górze we Radzionkowie i dzisioj chca jom wom polecić. Jak mocie jakie bajtle, to lepi niy treficie chobyście szukali na cołkym Górnym Ślonsku.
Jak przyjedziecie z Bytomia autobusym (17 abo 173), to musicie wylyź na przystankui "Radzionków Plac Letochów", przelyż pod wiaduktym i dali ulicom Zejera ciś piechty fest pod góra. Możecie tyz przijechać na kole i to jest chyba nojlepsze rozwiązanie. Ale dejcie se pozór, bo coby wjechać na niym na wiyrch, to musicie mieć sroge kółka i pora przerzutek. Na składaku ani niy próbujcie, bo sie zmachocie i hercklekotów dostaniecie. Nojprości i nojpryndzy dostaniecie się na Ksiynżo autym, terozki nojlepi lod strony obwodnicy.
A co robić na Ksiynży Górze? To niy ma leko pedzieć, bo tyla tam jest fajnych rzecy. Jak juz mocie koła, to karnijcie sie dookoła góry, a jak te koło mo terenowe opony, to ceko nas wos ekstra tor, na ftorym idzie sie poskokać. Ino niy zapomnijcie ło kasku na gowa. Poszpaceruwać po górze tyz bydzie dobrze. Trasa jest fest przyjymno, a możecie łodwiedzić zawartego we klotce dinozaura Radzia i łobejrzeć sie kaplicka Świyntego Huberta. A jak już bydziecie szpaceruwać, to musicie wiedzieć, co wiela lot nazod na Ksiynży Górze boło lądowisko szybowców i stacja zagłuszania Radia Wolno Europa. Dziś po nich prawie nic juz niy łostało.
Po skońcony rajzie siednijcie sie w ciyniu na ławkach, kupcie sie kawa w budce, a dlo bajtli lody, a jak zjedzom, to potym niych sie polotajom. Majom srogi plac zabaw ze huśtowkami i piaskownicom, a do tego park linowy z torym przeskód. Uciechy bydom mieli kupa.
Starsi i majoryntni tyz sie na Ksiynży mogom poruszać. Jest siłownia, jest boisko do fusbalu, jest kort tynisowy. No i do wszystkich basyn - nojpiynknij położony na Ślonsku. Ale na razie do niego niy włażcie, bo jesce wody niy naloli, alke to sie chyba kapniecie. Nalejom tak kajś na koniec czyrwca, a jak bydom nalywać, to zaś we chałpach na Ksiynży Górze przez pora dni woda z kokotka słabo poleci.
Komentarze