I we Radzionkowie, i we Bytoniu fest dużo ludzi godo: niy ma jak dychnonć sie na Rodos. Ale poleku. Niy godomy ło grecki wyspie, ino ło Rodzinnych Ogródkach Działkowych Otoczonych Siatką. Łogródek, czyli działek to drugo chałpa, tako gynał na ciepłe dni. Znom ludzi - a już nojbarzi takich na pynzyji, co na wiosna i lato przekludzajom sie na działek i tam durś żyjom, a do chałpy idom ino ja juz richtich cza. Pobuduwali sie sroge lauby, pociongli woda i sztrom, wstawiyli telewizory, łóżka, szranki i nocynie, tuz nicego im nie brakuje. A jak rano wstanom, to ino łotworzom drzwi i juz som na placu. Jak klara grzeje i jest hica mogom sie legnonc na ligysztuli abo na dece i łopolać, abo jesce lepi potonkać we łoczku wodnym, bo tyz prawie kożdy je mo, a niyftorzi to nawet basyny. Kej chcom zrobiom sie wuszt z rożna, łozpolom fojerka, narychtujom pieczonki i uwarzom łobiod z gymizów, co je noprzód posadzili - nojlepi tako zupa z uberiby (jak jom warzicie, to liści niy wyciepujcie ino tyz je wroźcie do gorka). A jak smakujom radiska, kapusta, abo łogórek z działki... A wiela łowocu idzie tam mieć: ponka, podzimki, wieprzki, porzecka, gruszki. Ja, dobrego jodla z działki niy brakuje, ino niy śmiyce myśleć, co po tych wszyskich hutach lostało w ślonski ziymi, bo byście sie niy pojedli. A jak sie starocie, to możecie mieć na dzialku ino kwiotki.
Ale musicie tyz wiedzieć, że dzialek to niy ino uciecha. Fto chce go mieć musi być fest robotny. Bo zaniym to wszystko wyrośnie, czeba sie narobić: przycinać asty, kopać w ziymi, podlywać, a do tego jesce maluwac pot, lauba i borsztajny z alejki, Niyftorzi som tymu radzi. Jo tyz zech kiedyś mioł działek i zowdy mie boło gańba, bo mie sie robić niy chciało, a chop co miło działek z boku zrobioł z niego łogród choby w jakym Wersalu. No, ale łon poradzioł godzinami łazić miyndzy grzondkami, kurzić i paczeć: rośnie - niy rośnie?
Jak zech mioł tyn działek, to dwie rzeczy mie szteruwały: inksi durś na fol puscali radio - nojcyńści ze szlagrami, a starsze baby nie łaziły w badikostimach ino we samych lajbikach. Możecie sie spokopić jakich.
Komentarze