Do grubiorzy pasuje gynau, bezto wziynli sie jom za patronka i fest ji przajom. Figury i łobrozy Świynty Barbórki zowdy boły na kożdy grubie: we cechowni, kaj grubiorze sie trefiali we ważnych momyntach i na dole, kaj rychtuwali ji małe kaplicki. Jeji wizerunek łobejrzicie na kożdy górniczy fanie, a wele łołtorza ze Świyntom Barbarom możecie porzykać we kożdym ślonskiym kościele - zowdy piyknie postrojonym i uszanuwanym.
To przonie niy końcy sie nawet jak juz gruba jest zawarto, a grubiorze na penzyji. Dejcie sie pozór na Klub Emerytów Górniczych ze Radzionkowa. Te fest fajne chopy jak jym gruba Powstańców Śląskich, na ftoro godali Buchac zlikwiduwali i postawiyli na jeji placu baza paliw sami przi wsparciu gminy wyruchtuwali skansen górniczy. Niy ino skludzili tam maszyny i wagoniki na wongel, ale we ceglanym budynku downy stacji transformatorów naszykuwali kaplica swoji patronki. Łest ło nia dbajom, a we środku na nojważniejszym placu postawili figura Świynty Barbary, ftoro bez duge lata stoła we cechowni na Buchacu.
I właśnie tam jom wzionli, jak juz Julka skońcoła fedruwać. Schowano za szkłym Barbórka łoblecono we biołe szaty i cerwono pelerina, z koronom na gowie i ze kielichym i mieczym w rynkach stoi w piykny kaplicce śtyrysta metrów pod ziymiom. Ino sie starom, kaj trefi za rok, jak zawrzom ta nasza łostatnio gruba.
Komentarze