Szukoł zech tymatu na dzisiejszy tekst po naszymu i tak zech sie pomyśloł, co wejrzymy na wyrazy ftore sie napocynajom na "sz". Som zeście radzi szklokom? Na pewno byliście za bajtla, bo ftory bajtel niy cyckoł szkloków, czyli landrynek - nojlepsze boły kopalnioki. Downi sprzedowali je we małych biksach, abo we tytkach. Dzisioj szkloki dostaniecie fajnie spakuwane w kolorowe nylon bojtle i możecie je nawet dować na gyszynk.
Jedni radzi jedzom szkloki, a chyba wszyscy przajom szekuladzie, czyli czekoladzie: gorzki, mlyczny, z roztomajtymi filongami, abo z łorzechami. Ja, bez szekulady życie niy miałoby synsu. Bezto jym jom kożdy dziyń. Rod bych tyz durś jod szpajza, ale śniom jest dużo roboty. Szpajza to tradycyjny ślonski deser, ftory zrobicie na bazie jajek. Konsystyncjo dowo mu żelatyna, a smak roztomajte dodatki. Jak dodocie citrona, to bydziecie mieli cytronszpajza, a jak kakao, to kakauszpajza.
Dużo tego jodła na "sz", a to jesce niy koniec. Fest dobre som szplitry, czyli popularne na Ślonsku, małe, półkruche ciastka ło wrzecionowaty formie. Dobrze je znajom we Radzionkowie, we internecie treficie nawet recept na "szplitry radzionkowskie". Toz niy ma dziwne, co godajom tam: „Łod szplitra jednego, chce się durś drugiego”. I końcymy ło jodle na sznicie. Sznita to kromka chleba. Jak jom słożycie, to mocie klapsznita.
Pojedzone bajtle mogom iś na plac i tam szczylać ze szlojdra, a więc strzelać z procy. Szlojder to tako wiynkszo, drzewiano proca na guzole, abo kasztany - fest niybezpieczno. Bo momy jesce mały szlojder, czyli gabla. Śni szczylo sie hocykami ze szisdratu, czyli cienkiego drutu strzelniczego. Downi łojce przynosili go chopcom z gruby. Dzisioj możno dostaniecie taki we sklepie, ale tego niy wiym na pewno.
Mielimy szkloka, a jest jesce szklorz. Tak sie po naszymy godo na szklarza. Szklorz może być szpyndlikorzym, czyli osobą małostkową, drobiazgową lub też przesadnie oszczędną. Bo jak ftoś jest rozsądnie oszczędny, to jest szporobliwy. Szpyndlikorz (abo inacy szpiterlok) może mieć we chałpie szpyndliki, ale niy musi. Na pewno mo je szwocka. Bo szpyndliki to szpilki, a szwocka to krawcowa. Co jesce u ni znojdziecie? Na pewno sztof, czyli materiał. I szwocka uszyje wom ś niego szaty ze szlicym, a więc sukienkę z rozcięciem.
Komentarze